газсыздандыру пункті

(Дегазационный пункт)

газдан тазарту пункті, уланған және дегазацияланған заттар қойылатын қоймалар, оларды жуып тазалайтын пункттер, дегазациялық машиналар орналасқан алаң. Д.п. бөлімдер мен бөлімшелерден келген киім-кешекті, аяқ киімдерді, қару-жарақты, қорғаныс саймандарын дегазациялауға және дезинфекциялауға арналады. Д.п. әдетте, елді мекеннен аулағырақ, суға жақын орналасады. Дегазация жасалатын алаң екіге бөлінеді. Бір бөлігіне "уланған" деген белгі қойылады. Бұл жерге уланған заттар әкелінеді, олар сортталып, дегаза-циялауға дайындалады. Екінші таза бөлігінде су, таза киім-кешек және дегазацияланған заттар қойылатын қоймалар болады. Бұл алаңға келгендер алдымен киім-кешек, аяқ киім, қару-жарақтарын шешіп, оларды буып, дегазациялау үшін арнаулы жерге өткізеді. Осы жерге барлық құжаттар мен заттар тапсырылады. Жуынатын жерде сабын және жөке беріледі, бактериялы заттармен уланғанда 2 пайыздық монохлорамин ерітіндісімен қолын, мойнын жуып, газтұмылдырығын шешеді. Әрбір душ торына екі адам орналасады — бірі сабын сүйкегенде, екіншісі сумен шайынады. Әрбір адамға 30 г сабын, 38 — 40 о-қа жылытылған 30—35 л су жұмсалады. Киінетін бөлімде әскерлер таза киім-кешек, аяқ киім, қару-жарақ және өткізген құжаттары мен меншікті заттарын алады. Қаруды, әскери техниканы, киім-кешекті, көлікті және жерді дегазациялауға дегазация машиналары қолданылады.